Beati immaculati in via, qui ambulant in lege Domini Tu es sacerdos

Beati immaculati in via, qui ambulant in lege Domini Tu es sacerdos

1
Misa yo gusabira no kwibuka
Nyakwigendera Mgr Dominique Ngirabanyiginya
(Misa yo ku wa 13 Ugushyingo 2016, i Buruseli)
Beati immaculati in via, qui ambulant in lege Domini
Mgr Dominique Ngirabanyiginya
1937- 07/09/2016
Tu es sacerdos in aeternum, secundum ordinem Melchisedech.
Ku Cyumweru Taliki ya 13 Ugushyingo saa 15h00, i Buruseli mu Bubiligi, muri Kiliziya yaragijwe
Mutagatifu Karoli (Eglise Saint Charles, Avenue du Karreveld 17, 1080 Molenbeek Saint–Jean),
Abasaserdoti ba Diyosezi ya Nyundo baba mu Bubiligi bifatanyije n’abize mu Iseminari nto yaragijwe
Mutagatifu Piyo wa X yo ku Nyundo n’Abakristu, Inshuti n’Abamenyi ba Nyakwigendera Mgr Dominiko
Ngirabanyiginya bahimbaje Misa ko gusabira no kwibuka uyu Musaserdoti, Umubyeyi n’Umurezi
witabye Imana taliki ya 07 Nzeli 2016 ku Nyundo mu Rwanda.
2
Uyu muhango twahimbaje twibuka kandi dusabira Mgr Dominiko Ngirabanyiginya wabimburiwe
n’igitambo cya Misa yatangiye saa 15h00, ikaba yarayobowe na Padiri Théogène Havugimana akikijwe
na ba Padiri Jean Baptiste Bugingo na Gérard Tumusabyimbabazi. Nyuma ya Misa Ntagatifu abitabiriye
uyu muhango twahuriye mu nzu mberabyombi ya Paruwase tuganira ku murage Mgr Dominiko
Ngirabanyiginya yadusigiye, twumva n’ubuhamya butandukanye bw’ababanye na we, abo yareze
n’abamumenyeye mu ndirimbo ze za liturjiya zogeye hose.
Igitambo cya Misa cyaranzwe no gusabira Mgr Dominiko Ngirabanyiginya twibuka imico n’imigenzo
myiza yamuranze nk’Umurezi mu Iseminari nto yaragijwe Mutagatifu Piyo wa X ya Nyundo tuzirikana
n’Umurage yadusigiye mu ndirimbo zinyuranye cyane cyane indirimbo zihimbaza Imana muri Liturjiya.
Izi ngingo zombi ni zo zagiye zigaruka haba mu ijambo rya Padiri Pierre Habarurema, mu nyigisho ya
Padiri Théogène Havugimana no mu buhamya bwa Padiri Jean Baptiste Bugingo.
Mu ijambo Padiri Pierre Habarurema yatugejejeho mu ntangiriro ya Misa yagarutse cyane ku murage
Mgr Dominiko Ngirabanyiginya yadusigiye kandi dukwiye gufatanya na Diyosezi ya Nyundo gusigasira
iteka.
Mu nyigisho ye, Padiri Théogène Havugimana yibanze cyane ku buryo Mgr Dominiko
Ngirabanyiginya yabaye umuhanzi uririmba impuhwe z’Imana akaba yarakundaga ibango rya Zabuli
88,2 rigira riti “Nzarata ntaretsa impuhwe za Mwiza” (Misericordias Domini in aeternum cantabo). Kuba
Padiri Théogène Havugimana yarabanye na Mgr Dominiko Ngirabanyiginya mu Iseminari nto yo ku
Nyundo bombi ari abarezi ngo bikaba byaramuhaye kumva neza kurushaho ukuntu Mgr Dominiko
Ngirabanyiginya yari umuhanzi mu buryo bw’umuhanuzi koko; ni ukuvuga kuba irango rirangira abandi
Imana Nyirugusingizwa. Koko rero, indirimbo nyinshi za liturjiya Mgr Dominiko Ngirabanyiginya
yahimbye dukoresha muri Kiliziya mu Rwanda zidufasha gusenga Imana koko. Yaragize ati “Indirimbo
za Mgr Dominiko Ngirabanyiginya, yewe n’izo dutangira kwiga twumva zikomeye, iyo tumaze
kuzikeneka, dusigara turirimba twumva dusenga koko, zidufasha kwegera Imana, kuganira na Yo no
kubana na Yo mu mpuhwe zayo”. Padiri Théogène Havugimana yatwibukije ko kuba Mgr Dominiko
Ngirabanyiginya Imana yaramuhamagaye muri uyu mwaka w’impuhwe z’Imana kandi na we
yararanzwe no kuririmba impuhwe z’Imana ari ikintu gikomeye cyiyongera ku Mizero yacu y’izuka rihire
bigatuma twishima, tunashimira Imana yo yaduhaye Mgr Dominiko Ngirabanyiginya ikaba yarisubije
kandi na we tukaba tuzi neza ko adusabira. Ibyishimo byacu bikaba bishingiye rero mu busabane
bw’Urusange rw’Abatagatifujwe dufitanye n’ab’Ijuru, ari na byo biduha gushimira Imana Ubuzima
n’Umurage bya Mgr Dominiko Ngirabanyiginya.
3
Mu buhamya Padiri Jean Baptiste Bugingo yaduhaye Misa igana ku musozo, nk’uwabanye igihe
kirekire na Mgr Dominiko Ngirabanyiginya mu Iseminari nto ya Nyundo bombi ari abarezi, na we
yagarutse kuri Mgr Dominiko Ngirabanyiginya (la personnalité de Mgr Dominique) yemeza ko koko ari
umwe muri ba bantu biba bigoye kuvuga binoze. Yagarutse ku buryo Mgr Dominiko Ngirabanyiginya
yari umurezi nyawe, ufasha abaseminari kwiga bashyizeho umwete no kuzaba abagabo bahamye, baba
Abasaserdoti, baba Abalayiki; akaba umurezi waranzwe n’igitsure kijyanye n’ineza n’ukuri kandi
umurongo aha abandi akawubahiriza kubarusha, akaba yarabaye umuntu urangwa no kubahiriza igihe
(ponctuel) iteka yewe no mu gihe yari arwaye. Ikindi ngo Mgr Dominiko Ngirabanyiginya yari umuntu uzi
kumva, kubona no kuririmba impuhwe z’Imana, urukundo n’ubudahemuka byayo akaba ngo
yarabibonaga mu mutuzo, mu isengesho, muri bagenzi be no mu biremwa. Mgr Dominiko
Ngirabanyiginya ngo akaba yararanzwe kandi no kuba iteka umusemburo w’ubumwe mu Bapadiri
bagenzi be bagiye babana. Mgr Dominiko Ngirabanyiginya ngo yari umuntu utinyitse ariko kandi abantu
bose bisangaho, uvuga make kandi ntagaragare cyane ariko kandi akaba ari we wabonekaga mu
Iseminari kurusha abandi, byaba guha umwanya abo bafitanye gahunda no kuzubahiriza, byaba no
kuba umuntu ufata igihe cye akumva abamugana. Yaranzwe no kwibera mu Iseminari ariko kandi ngo
ugasanga azi amakuru yo hirya no hino kurusha abandi, arangwa no gusenga cyane kandi akaba ari
mu byo akenewemo byose kandi akabinoza. By’umwhihariko yatunganyije binoze umurimo wo kuba
ushinzwe amasomo (préfet des etudes) mu Iseminari nto yaragijwe Mutagatifu Piyo wa X ya Nyundo
igihe kirekire. Mgr Dominiko Ngirabanyiginya yahimbye indirimbo nyinshi, akazigisha abaseminari zaba
iza liturjiya, zaba iz’ibirori ndetse n’iza fanfare ya Seminari ya Nyundo yogeye mu Rwanda hose.
Muri iyi Misa twaririmbye twishimye indirimbo za Mgr Dominiko Ngirabanyiginya bidukumbuza ku
Nyundo ndetse dukomeza kuririmba n’izindi nyinshi yahimbye ari nyuma ya Misa tukiri mu Kiliziya ari no
mu nzu mberabyombi ya Paruwase. Urutonde rw’indirimbo za Misa rwari uru rukurikira:
Introit : Dusengere Uhoraho mu Ngoro atuye ntagatifu
Kyrie : Nyagasani tubabarire (ad libitum)
Gloria : Imana nisingizwe mu ijuru
1ère Lecture : Nyagasani ni wowe ufite amagambo
Acclamation: Ndi umuzabibu + Alleluya Jambo yigize Umuntu
Prière universelle : Mwimanyi utubabare
Offertoire : Nyagasani nzamwitura iki ?
Sanctus : Nyir’ubutagatifu
Anamnèse : Tantum ergo
4
Agnus : Ntama w’Imana
Communion : Nyagasani duhe kugira umutima mushya
Nyagasani Mana Yanjye, Roho yanjye igufitiye inyota
Action de grâce : Roho yanjye singiza Nyagasani
Sortie :
Nzahora namamaza
Nyagasani ugukurikira
Mu nzu mberabyombi ya Paruwase, nyuma ya Misa, gahunda zo kuganira, kungurana ibitekerezo no
gusigasira Umurage wa Mgr Dominiko Ngirabanyiginya zayobowe na Bwana François-Lucien
Hitimana. Abandi batanze ubuhamya b’ingenzi bakaba ari Padiri Pierre Habarurema, na ba Bwana
Ignace Rukeribuga, Emmanuel Ufashingabo, na Jean Damascène Ndayisaba. Aba bose bakaba
barongeye gushimangira ko dukwiye gutanga umusanzu ukomeye ngo Umurage wa Muzika wa Mgr
Dominiko Ngirabanyiginya uzakomeze. Batwibukije ukuntu Mgr Dominiko Ngirabanyiginya yakundaga
kwereka abaseminari ibitagenda ariko ntashyire imbere ibihano ahubwo akabigisha ko kwikosora no
gutera imbere mu cyiza bishoboka iyo umuseminari abyiyemeje, akirinda gukorera ijisho, akamenya
kwinyakura( la ponctualité et la rapidité), kwitsinda (la maîtrise de soi et l’esprit du sacrifice), kwitanga
(la serviabilité), kwihata no kunoza ibyo ashinzwe (l’effort et l’excellence). Abize mu Iseminari nto ya
Nyundo kimwe n’abandi bize mu yandi Maseminari bari bitabiriye uyu muhango bose twahurije ku kuba
Abarezi bakomeye babaye mu Maseminari yo mu Rwanda twese tubumva nk’abarezi bacu kuko
imigenzo myiza, imico myiza n’ingingo-hame z’uburere basigiye abaseminari twese tuzisangira iyo
duhuye, tukazisangamo, tukazisigasira kandi tugaharanira ko zihererekanywa iteka.
Abize mu Iseminari nto ya Nyundo babarizwa mu Bubiligi twashimishijwe no kuba twongeye guhuzwa
na Mgr Dominiko Ngirabanyiginya twese twamenye nk’Umurezi mwiza, twibukiranya imico myiza
n’indangagaciro yakundaga kugarukaho igihe cyose twamaranye na we, bituma twiyemeza kugira
itsinda ku buryo, mu rugero bizadushobokera, twajya dushaka akanya tugahura tugakomeza kunga
ubumwe, gutera imbere no gutanga umuganda wacu ngo tunateze imbere Seminari yatureze, Diyosezi
ya Nyundo, Kiliziya mu Rwanda n’igihugu cyacu dukunda muri rusange.
Uyu muhango w’uyu munsi ukaba warasojwe n’amafoto y’urwibutso n’Umurage dushimira Imana
yaduhayeho Mgr Dominiko Ngirabanyiginya Umusaserdoti, Umurezi n’Umubyeyi.
Padiri Déogratias Bahizi