Ho Annabiyoŋoŋo Anlóbne a Gubaarhu M

Ho Annabiyoŋoŋo Anlóbne a
Gubaarhu M'apahunkunehne
Jamaŋo
A waathu Eliyasa ingi Inus, Díino
atéekinteekin annabiyoŋ índukoŋ a gubaarhu
M'apahunkunehne jamaŋo. Ayéjeeniŋ mara
marigeno, úmár adékekine a duniyaŋo. Afak
atékineeniŋ honjoŋ holabahi a gubaarhu
úmár.
Gúliho, béntenteŋ ho Díino atéekinne
annabiyoŋo m'arethune Esay, a gubaarhu
M'apahunkunehne jamaŋo.
Ho Esay añaañne inhohiye:
¹⁴ - Inga! Umuyhintor faŋo
anéekunoonuŋ tamaaseer.
Tamaaseero nómár ingine inno:
«Bágid ba pájiireŋ údiigeen
adookuneh badooh. Aŋankáneh wol
údiigeen m'arethunuh Emañuwel.»
Nómár ingine tamaaseero no
Umuyhintor anéekunoonuŋne.
Nim Annabila Esay alóbne.
(Esay 7:14)
Díino atéekinteekin Esay mara bágid báduk
abosháne M'apahunkunehne jamaŋo. Bágid
ba pájiireŋ údiigeen, úmár aboshánehne
M'apahunkunehne jamaŋo.
Béntenteŋ faka ho Esay añaañne kánduko a
nintiku M'apahunkunehne jamaŋo.
K'inliirehoŋ Líibárhu Gúloku Díino:
Ningeŋ baŋ! Diino anahnah mintor
wol. Díino akaankaan ki kódiigeen
abosaa a binentor. Wolo úmár Díino
anéereemneer k'amara maasayaŋo.
Ahuyhunuh: «Unaku jamaŋo jamméej
ajóoni dáde, wola Díino n'ayikne
sembe, wola bááho mu baman
dagurumaaren, wola Ubáku
umaasaŋo m'adoohurokunehne
jamaŋo básuumo. Nim
gahuyhunuhne.»
Nim Annabila Esay alóbne.
(Esay 9:6)
Fégeŋ baŋ, M'apahunkunehne jamaŋo
agúyhune údiigeen. Agúyhune úbáku
udikaam. Kanda jamaŋo anhuyhunom,
«Díino n'ayikne semben.» Lentaareŋ mara
Díino bareŋ apirenne apahun mintor.
Díino bareŋ apirenne apahun úbáku
Ibrahiima.
Díino bareŋ apirenne apahun mintor a
kuyoho ku Díino ayohenkinehne
m'anjégimehne luwaŋankánam. Díino bareŋ
apirenne apahun mintor. Angu, Esay
añaañaañ mara M'apahunkunehne jamaŋo
agúyhune Díino faŋo. Umár ahuyhunuh
«Díino n'ayikne semben.»
K'inliirehoŋ faka ho Esay añaañne kánduko,
ho Díino atéekinemne a nintiku
M'apahunkunehne jamaŋo.
K'inliirehoŋ Líibárhu Gúloku Díino:
³ - Udíigeeno úmár jamaŋo
anjutiyeemjuti, ancicuneemcicun.
Umár afégfeg bafég. Ayikik aribeŋo
dáde. Jamaŋo síibaaraŋaŋ
búfekineem, anjutiyeemjuti,
búuñaaroom.
⁴Haman nim úmár ingine
m'adoohunane kuyoho ku mintor
inwarahoonuŋ indoohunahoonuŋ.
Umár adoohunarne mintor
h'ehoonkoonuŋne. Kanda, mintor
f'ínfegoonuŋne hómár inlahoonuŋlah
karo Díino gayohenkeemne ki gúmár
akaanne Díino abéni jamaŋo
k'ammalaam, anfégineem,
anrohulineem. Nim ginlahoonuŋne.
⁵Kanda a gubaarhu hójoondoŋo ho
mintor inkaanoonuŋne
gammalumaane. A gubaarhu
jínubonkintor gammalumaane
buruhu mintor. Inini a gubaarhu
n'anyoheneemne hafitenkintor ayik
basúum. Umár gampálláne a gúbidhu
mintor ki mintor inyikumoonuŋ na
kanjébo.
Mintor tuu inkilahoonunkila binaalo
k'ínniimoonuŋ iniman ni saahaŋaŋo
ankilahne binaalo k'anniimeh.
Moŋon-moŋon atiftif binaahánam.
Nim ginkaanoonuŋne kanda
Umuyhintor akaanne ki úmár
adoohuna kuyoku jínubonku mintor
tuu.
⁷Udíigeeno úmár abénben jamaŋo
k'anfégineem. F'ankaaneemne nim
akota, alahoora man ni saahaŋo
akotaháneh fo jamaŋo
annohulineemne ba budaamulo. Man
ni saahaŋo akotaháneh gawonni a
janoku m'anlekhineháneh
jagendhinem, man nim gakotane.
⁸Anlahaam k'ankalamaam, anlek
balóbo kanda lekireŋeŋ hóbun.
Afúrumi na ambujoom. F'aniirone
hóge ayikyik m'ayik bankabaŋ? Agida
anyohenyohen úmár a gubaarhu
jínubonku siyhum.
⁹F'aniirone anninkahineem ingi
m'anlápárne. Baniiroy anninkahin
búgáákánám ingi m'anyikne nááfulo.
Agida dújuroŋ wúur. Joduroŋ wúur.
¹⁰Bikaanenku Umuyhintor akaanne ki
údiigeeno úmár ayohenaa.
Umuyhintor aŋoolin ayéj:
¹¹«Biniirohánom akaankaan sada a
gúbidhu jamaŋo k'ipiren ibonker
jínubonkánin. ¹²Mara alókiloki
k'abujaa. Haani yikireŋ jínub abénben
jamaŋo k'anjodamaam anyéj: «Umár
ukaanku hójoondoŋo.» Umár faŋo
adoohunadoohuna kuyoku
ñankaanku jínuboŋo.
Ahooŋunemhooŋun k'ibonker
m'anjégumne luwahum». Nim
Umuyhintor ayéjne a nintiku
údiigeeno úmár.
(Esay 53:3-12)
Díino atéekinteekin Esay halób halabahi a
nintiku M'apahunkunehne jamaŋo. Halóbo
hadúko aléerleer bupájul, kanda h'arennáne
íngine, M'apahunkunehne jamaŋo
aníirohune! Aníirohune iniman ni saaha,
iniman ni leya aníirohunehne. Iniman ni
leyaŋo aníirone buruhu úbáku Ibrahiima ki
úmár apah a bíniiroŋo, maŋ nim údiigeeno
M'apahunkunehne jamaŋo aníirohunehne
k'impirenoonuŋ impahoonuŋ a bíniiroŋo bi
bandor. Díino ayéjyej a gubaarhu
M'apahunkunehne jamaŋo, «Bíniirohánom
akaankaan sada a gubiduhu jamaŋo k'ipiren
ibonker jínubonkánin.» Ningeŋ baŋ!
Annabiyoŋoŋo anlóblob bandor mara
M'apahunkunehne jamaŋo añantay aníiro.
Ninginkinteŋ hañaañeno k'úpájuláŋ mara
ungoona.
Díino afak atéekin annabiyoŋo m'aretuhne
Mike gúlob a nintiku M'apahunkunehne
jamaŋo. Atéekinem kantígo k'aboshunuhne.
K'inliirehoŋ Líibárhu Gúloku Díino:
¹Betlihem abokbok a ñokooro
ñotiirinno ño resiyonku Efarata.
Kanda haani n'agune kokoor kotiiri a
akooronku jamanku Juda, wúur úde
afúrumokuneh na. Wúuro
m'akumandehánehne a gurethum
jamanku Israyel afúrumokuneh
kokooro kómár. Agida úmár
umoobim biriman famiñi.
(Mike 5:1)
Udíigeeno M'apahunkunehne jamaŋo
aboshunuh a kokooro k'aretuhne Betlihem.
Kokooro kómár atejateja ingi Jerusalem.
Dawda, Betlihem gabosaane. Angu,
m'afúrumokunehne a muhenku Dawda,
M'apahunkunehne jamaŋo, úmár mees
aboshunuh Betlihem. Nim Díino atéekinne
Mike.
Angu Díino, horaŋ gatéekinne annabiyoŋoŋo
mi fam a gubaarhu M'apahunkunehne
jamaŋo?
Esay 7:14
Bágid ba pájiireŋ údiigeen abosháne
M'apahunkunehne jamaŋo.
Mike 5:2
M'apahunkunehne jamaŋo aboshunuh
kokooro k'aretuhne Betlihem.
Esay 9:6
M'apahunkunehne jamaŋo agúyhune Díino.
«Ahuyhunuh Díino n'ayikne semben.»
Esay 53 M'apahunkunehne jamaŋo
aníirohune.
«Bíniirohánom akaankaan sada a gubiduhu
jamaŋo k'ipiren ibonker jínubonkánin.»
Lentaareŋ ho Díino atéekinne Iblisa fam a
gubaarhu M'apahunkunehne jamaŋo.
Genes 3:15
M'apahunkunehne jamaŋo afaŋánaháne
Iblisa.
«Kanda ayikhineh úduk adímbayahu
dikaamo m'afilihinehne bigokon.»
Angu, annabiyoŋoŋo iniman Esay ingi Mike
anlóblob dáde a gubaarhu
M'apahunkunehne jamaŋo. Kanda immereŋ
anníironiiro ni úmár pútururoŋ a duniyaŋo.
Díineŋo jup awusuna. Díineŋ kemeŋ
arenekeŋ. A waato amár bukoku Rom
ayikyik sembe dáde a duniyaŋo. Rom íngine
kapitaalhu Italy. Angu, famo Rom ayikyik
sembe dáde. Yikireŋ bukoor búduk a
duniyaŋo b'awatah akooroŋo iniman Rom.
Armehinem ayikyik sembe dáde. Afaŋánay
jamanku Frans, afaŋána Angláter, afaŋána
Esipt, afak afaŋána Israyel.
Umaasahu Rom amarane didiiraŋo dímar
níp, birman Angláter baman Israyel. A
didiira-didiira anink na gufernár ingi
soldaareŋ. Akaan ki jamanku didiiraŋo
d'amarane anjóonindem anaalaŋ. Akaan ki
jamaŋo níp ancaam bahataŋo ki umaasahu
Rom ingi jamankánam anyik bakodiŋo jup.
Ñamhu Israyel síibaaraŋaŋ ki jamanku Rom
ammaraheeniŋ. Lókiireŋeŋ ancaam bahataŋo
ki bakodihinin adék imbi umaasahu Rom
ingi jamankánam. Ansíibáásiib ki mu Israyel
amara didiirahánin. Síbaaraŋaŋ ki umaasahu
didiira díduk amaraheeniŋ.
A waato amár ñamhu Israyel anyikyik guret
gúduk. Ganhuyeeniŋhuy Ñansuyifo. Imbi
immereŋ ayikyik dayraŋo jup. Ayikyik
dayraŋo n'aretuhne ñansaduseyaŋo.
Immereŋ dómároŋoŋ Líibárhu Gúloku Díino
níp. Andóm gúbid ungonduk bareŋ. Faka
ganyéjeyej mara malekaŋaŋo yikireŋ. Afak
ayik dayraŋo n'aretuhne ñanfarasiyaŋo.
Immereŋ ampápájul luwaŋanku Díino kanda
ambecinbecin na luwaŋaŋ adúkoŋ. Immereŋ
anlah mara anfaŋfaŋ jamaŋo níp n'anjóon.
Anyéjeh kara n'ambuuñahne luwaŋaŋo jup,
andékhine Arjanna.
Anfuhurinoorafuhurinoora dáde. Angu
Díino súumurom a gubaarhu immereŋ. Imbi
Ñansuyifo m'ankumandene Israyel ayikyik
na ñanfarisiyaŋo jup.
Kanda anyikyik Ñansuyifo a waato amár
m'ampokunne Díino, m'anfiyumemne a
hafitenkinin. Ampápájul mara
anjégumjegum luwaŋanku Díino, kanda
ankuubulkuubul jamméjenkinin imbi Díino a
gubaarhu jínubonkunin. Immereŋ, bísibaŋo
bi Díino abúñokunehne údiigeeno
M'apahunkunehne jamaŋo gantuyohne
iniman ni Díino ajikirinne fam.
Immereŋ ampápájul mara famo a toolhu
Iden, Díino ajikirinjikirin mara ayikhine
bísiba bi udikaam úduk aboshune wol. Wolo
úmár alaamedir, afilihine bigoku Iblisa.
Afaŋánaháne Iblisa dáde.
Anfak anliire a Tawrato ni Díino ajikirinne
Ibrahiima mara M'apahunkunehne jamaŋo
afúrumokune a muhenkinem, a
dimbayankánam. Nim, a gubaarhu Ibrahiima
Díino akaankáne básuum a siyeŋo níp
n'angúne a duniyaŋo.
Jamaŋo anfak anliire a liibárenku
annabiyoŋoŋo iniman Esay ingi Mike mara
M'apahunkunehne jamaŋo aboshunuh a
kokooro k'aretuhne Betlihem. Nunom
agúyhune bágid ba pájiireŋ údiigeen.
Anhuyhunom Díino n'ayikne semben, kanda
alaamerdir aníirohune. Bíniirohánom
akaankáne sada a gubidhu jamaŋo ki Díino
apiren abonker jínubonkánin.
Hómáráŋ níp Ñansuyifo anliireliire a
Líibárhu Gúloku Díino. A waato no jamanku
Rom ammarahne didiirahu Israyel,
Ñansuyifo jup immeena n'antuyoh bísibaŋo
bi Díino abúñokunehne M'apahunkunehne
jamaŋo iniman n'ajikirinne a Liibárhu
Gúlokunom. Ampápájul mara úmár
agúyhune umaasaŋo iniman Dawda, kanda
agúyhune umaasahu duniyaŋo níp baman
dagurumaaren. Gúmár akaanne anretem
Umaasaŋo mu Díino Acaabenne. Ñansuyifo
índukoŋo anfiyumfiyum Díino. Anlah mara
Díino akaankáne h'ajikirinne fam. Afero
mara abúñokune Umaasaŋo mu Díino
Acaabenne, M'apahunkunehne jamaŋo.
Angu, marigeno, nim Díino akaanne. Riñoŋo
n'adékirehne uyennehinkineŋ n'adékorumne
ki Díino abúñor M'apahunkunehne jamaŋo.
Ufékineŋ ni Díino akaanne hoŋon-hoŋon
h'atéekinne annabiyoŋoŋo famo a nintiku
M'apahunkunehne jamaŋo. Díino gira
aruurumoh. Gira abayunah h'ajikirinne.