Mi romersi sat la mèt an plas Bébèt TNT sé in gayar lidé i rasanm

Mariline DIJOUX :
Mi romersi sat la mèt an plas Bébèt TNT sé in gayar lidé i rasanm domoun té oz pa tro, lavé
pér konm mwin, rakont zot ti kont èk zot maniér.
Lé vré té in gayar zourné!
Mi éspér Bébèt TNT va pa arèt la minm, va suiv son ti somin, gran somin!
Nou artrouv,
Mady Wolff :
Moin osi moin lé byin kontan moin la partisip gayar zafer komsa.
Touléka, pou in lapranti foto, ou débrouy pluto byin. Le band foto lé tré korek.
Mersi ankor pou tousala.
Ni artrouv pou dot futur zokazyon mi espèr.
Nathalie SOLIMAN :
Bonzour,
La été un plézir pou moin reçoi azot. Tou lmoun té là la aprécié, gramoun kom marmay. Tou
le peu lété kolé si zot chaise pou ékoute zistoir. Merci azot, la été un super lekspériens, juska
ler, nou en parle enkor. mon band kollèg lé intéressé ossi, i devré pa tardé pou prendre kontak.
Gran merci enkor,
Philippe BESSIERES
Fonkèr la lang
Mon Lang?
In lang koson i bat dan la bou
Mon lang lé pa in lang ?
Mon lang i langèt aou
Mon lang i koz tousèl
Rod pa kisa la di intèl
Mon lang na poin lo kor
Akout ali tawar!
Na poin persone dann fénwar
La lang na poin lo zo foutor!
Mon Lang i ème fé kozé
A défo lès parlé
Si nana va done ali
Mi sa na poin va koz dési
Kisa la di la lang lé Malang
Lé bon pou pakwé
Alé done pou gouté
Lès di sat na pou di
Kan i larg, i sort an kouli
Mon lang i bat ladilafé
Alé donn pou gouté
Marmay lékol i poz pi la kol
i fé pèt la kol dan la kour kréol
Léa VARON :
Wi nou la ozé dir bann de moune anon TNT ! ( prononcer TINN NOUT TELE )
Anyiél ek Alex la di wi é la invit zot bann dalon
Bana la pa di non
é pourtant zot i konésé pa vréman
kosa i voulé dir se kozman
la fé konfyians
bann rakontèr la rant dann ron
mésié médame la sosyiété, bann zenfan en parmi
pou inn fwa , pou inn bone fwa la giny asiz déor
pou mèt ensamb dann kartyié RDR BRAPANON
La komans par bann ti zistwar pou fé ri la boush
en guiz zamuz guèl
détrwa sirandane la komans fé shof in peu
le bann koko
mé la pa kas koko pou bwar de lo
bann marmay la komans toush bann pèrkusiyon
té ki atann trankilman désu gazon
la enshinn ek inn ti morso la mizik
en atandan bann retardatèr
é la swaré la komnansé poud ‘vré
desou pié d’ lètshi , sou la varang, dan lalé
Navé pwin aryink zorèy té gran rouvèr
lé zié té ki bry konm grin longani
la min té ki aplodi !
rézman a tèr navé pwin fourmi
le voyaz la komansé
Tout la enbarké
persone la pa kit le ron
minm pa pou alé kabiné
é mi peu asur azot ka lèr kas in poz
pou manz in gazon
bin bana té pa présé lévé
Kan na bon manzé pou le kèr
léstoma i rés a tèr !
mé lés a mwin dir azot
ke li la pa fé le difisil
devan lapéritf !
Alèx la sort son boutey aranzé depi je n’ sé kan
é na pwin inn la fé le difisil
devan in bon rougay socis
par d’su in gazon de rizone
le rougay zévi ek zashar bilinbi
la akonpany la désante
san konté le p’ti vèr d’ vin
zis pou le plézir !
ah !mé zami, mèt enkor lapasé
laziska di manz gato toud‘swuit
pengar i kas lanbyians talèr !
Kan mizisyin la komans bat roulèr
kayamb la pa rès à ter
sétaki la rod in manir rant dann ron
é Fonnkézèz la mèt son grin d’ sel
la vwa mésyié, médame la sosyiété la monté
Sak bann marmay en parmi
é pou inn fwa, pou inn bone fwa,
la pa fé tonmb la pli
dann kartyié RDR BRAPANON
Le voyaz larkomansé
é nou la lès a nou enporté
sak mi rapel sirtou
sék na pwin inn té présé
débarké
sof sak i devé alé fé in tour dan in not véyié
la parti mé lartourné
é navé regré kit la kaz Alex ek Aniyèl e
la kozé enkor in peu dan lalé
fonnkézez la bers a nou enkor in kou
ek son parol zenfan Lamour
é tipa tipa, nou lariv dann baro
la fali shant morso « poulayié «
pou fé konprann in peu ké lété lèr pou alé
té pa fasil pou nou séparé
na in kok la shanté
é la de moune la fané
ek regré
Na de trwa la giny lenvi
arfé in swaré TNT
Pars … na in fwa pou inn bone fwa
na de moune lartrouv lanbyians
lontan
kan gran momon ek gran papa
té ki rakont zistwar
lontan
na byin lontan
mé té sitantelbon !!
Zordi , konmki diré
nou artrouv le gou
alor tynbo, larg pi !!!!!!
MLV , zordi gran matin le 4 avril
Suzèle et Georges :
merci ou même d'avoir fait passer et marcher l'idée géniale ! merci aussi à tous ceux qui ont
joué le jeu !
à une autre fois
3 avril
Sandro LAVAREL :
Madame BARRET bonzour,
Alala in moman mi doi ékri a ou, zordi mi pran mon tan é mi fé.
Mersi ankor pou lo tan ou la pran pou vni la kaz rakont zistwar band marmay, out band
zistwar la révéy souvnans bandna (dé trwa la rapèl zot grandmèr), la été in leson d'moral. Mon
fiy lé fièr lo liv ou la of a èl é mi lé kontan ké band marmay lespas ininstant zot la dékros zot
systèm abitièl.
Ankor in kou MERSI, MERSI, MERSI.
Alé narvusa.
.